Nase el forum połitego dełi Veneti

Nase el forum połitego dełi Veneti.
Dixi ła tua su tuti łi temi połiteghi deła Venetia.

Va rento da

e struca el boton Forum połitego

cosa ke me piaxarìa de un movimento indipendentista deła Republica Veneta

Ałora, ve antisipo cosa ke me piaxarìa e cosa invese no vorìa de un movimento indipendentista deła Republica Veneta kel vaga nasar in un’asenblea costituente.

No vorìa pì ke ghe fuse łi famoxi procesi oscurantisti stiłe Lega-Łiga. Kuełi in cui łi te spetava su na stansa in un s-ciapo, a sorpresa pa farte barba e cavełi. Ki ke lexe forse el xè xovane, ma no gavè idea de cuanti ke ghe dovuo afrontarghene in pasà finké gò decixo de ndar par ła me strada.

Altre robe ke no me piaxarìa:

• Ła creasion de un movemento setario da ndoe xè pì fasiłe ndar fora ke entrarghe: qualcuno xè proprio convinto ke ghe sia na corsa sul caro de un movimento ke se bate par l’indipendensa deła Republica Veneta? Se fusimo drio costruir forsa tałia, o łi novi diesse forse el gavarìa anca raxon…ma dai, un movemento indipendentista par voialtri gało sti problemi? Ghe ne gavè mai fato parte? Mi sì. Ghe ne gò xà creà uno. Ve poso asicurar ke ła strada parké ghe entre łi caregari ła xè longa e piena de ostacołi par łori.
• Ła non disponibiłità ad afrontarse in publica asenblea. Cuesto in asołuto xè el punto ke pì me bruxarìa. Vorìa dir costruir un movemento de masoni! Se fuse cusì, no me intaresa.
• Ła mancansa de umiltà nel non vołer inparar dałi erori del pasà e volerli rifar a tuti łi costi. Łe robe pena mensionae łe xè stae forse łe cantonae pì grose de ki ke ne gà preceduo trent’ani fa e ne gà risvejà łe cosiense. Deso, rifar łi so stesi erori vol dir mancarghe de rispeto nełi inseniamenti ke ne vien dal so percorso. Noialtri rispeto a łori semo fortunai parké conosemo ndoe ke łi xè ndai sbatar el muxo.

Vanti ke el momento xè cueło bon par stacarse!

www.republicaveneta.com

Asenblea del novo Movemento de Indipendensa deła Republica Veneta

Xè da poco ke gò comisià a scrivar su siti Veneti.

Xè da tanto ke creo ke bixogna movarse anca połitegamente e no soło culturalmente.

Ripeto, xè da tanto ke creo ke bixogna movarse połitegamente dała pałude de deso. Łi partiti atuałi no merita considerasion.

In particołar creo ke ała Venetia ghe manke un s-ciapo de omeni e de femane, un movemento, na organixasion połitega ke gapia l’obietivo de restituirne a dignità połitega ke me manca da tanto tenpo. E creo fortemente ke ła politega forte se fa ała luce del sol, in publico e sensa paura de nesuni.

Duxentonove ani fa ghemo perso ła nostra sovranità par man de napoleone, el bin laden del tenpo e coła responsabilità dełi nostri ultimi inglorioxi rapresentanti de ałora, infiltrai de traditori deła Venetia.

Sentocuarantani fa ghemo perso el nostro rango de stato e ła serenità, ghemo avuo ła diaspora de un Veneto so do e tra poco ris-ciemo de perdar par senpre ła nostra łengoa e ła nostra identità, tuto par man del criminale dełi do mondi garibaldi e dei buxiari dei savoia, co i so degni eredi governanti tałiani da ałora fin deso.

Da ałora ghemo subìo:

· 2 deportasion de masa;
· 1 pułisia etnica dała nostra tera de dalmasia e istria
· 2 pułisie etniche dałe tere de Romania e Libia ndoe ke i ne gavea mandà i ditatori de ałora;
· 1 disuaxion etnica in tera de Venetia Tridentina (o Alto Adexe o Sud Tiroło);
· 6 ocupasion;
· 3 guere;
· 27 spartision deła nostra tera.

Dirìa ke basta cusì!

Łi omeni e łe femane de bona volontà ke vol seguirne e crear sto s-ciapo de soci fondatori łi pol contatarne atraverso el blog http://veneto-libero.blogspot.com/ par dar forma al novo Movemento de Indipendensa deła Republica Veneta.

A breve organixaremo ła prima asenblea costituente ndoe sarà sielti, co un dibatito tra tuti łi prexenti e co el so voto:

· el nome del Movemento
· el simbolo del Movemento
· el statuto del Movemento
· la diresion połitega del Movimento
· i raprexentanti del Movimento
· se partecipar o no ałe elesion del stato tałian e dełe so aministrasion locałi.

Cuelo ke xà xè sicuro xè:

· el obietivo, ke xè ła riconquista deła dignità połitega deła nostra tera, atraverso l’otenimento Serenisimo e nonviołento deła indipendenza deła Veneta Republica nel spirito deła so storia miłenaria.
· L’uxo escluxivo deła łengoa Veneta nełi dibatiti e nełi documenti de dełiberasion deła asenblea.

Uno, diexe, sento o miłe noialtri scomisiemo, viento anca ti?